Wednesday, September 20, 2017

طريقة عمل مارون جلاسيه بالصور

المقادير :

 

كيلو أبو فروه بحبات كبيره ( كيلو قبل التقشير موب بعده )

١٥٠٠ جرام سكر

لتر ونص مويه

عود فانيلا مقسوم بالطول

١٠٠ جرام سكر بودرة

 

* الميزان هنا ضروري و الحساب مهم هنا إنه يكون بشكل جدا دقيق لأننا راح نزيد تركيز الشيره بإننا نضيف كمية سكر معروفه بدال ما إننا نطبخ الشيره لحرارة معينه زي ما وصفات ثانيه تستخدم هذا أسهل غير إنه يجنبنا الحاجة لإستخدام ميزان حراره.

 

* راح تحتاجون كمية أبو فروه أكبر من اللي مطلوب عشان تطلعون منها كيلو بحبات كبيرة. كثير من الحبات بتكون خربانه أو ما تتقشر أو تتكسر وقت التقشير وعشان كذا نبدأ بكمية أكبر من اللي نحتاج.

 

* عود الفانيلا هنا أشوف إنه ضروري ، الوصفه راح تصير بدونه ويمديكم تستخدمون شي ثاني زي بودرة فانيلا أو فانيلا سايلة أو تتركونها حتى من الأساس بس من ناحية الطعم مافيه شي بيكون قريب من الفانيلا الحقيقية.

 

 

الطريقة :

 

* اليوم الأول :

 

اليوم الأول هو اللي فيه كل الشغل تقريبا باقي الأيام الشغل فيها ما يتعدى دقيقه تقريبا.

 

الخطوة الأولى : تقشير أبو فروة :

 

يمكن أصعب خطوة في المارون جلاسيه هي تقشير أبو فروة بحيث يطلع معنا بقطعه وحدة. القشرة الداخليه بالذات هي اللي بتتعبنا شوي، بعض الأحيانا تطلع بسهولة بدون أي تعب وبعض الأحيانا تحتاج شوي فرك وبعض الأحيان بيكون مستحيل تنشال القشره الداخليه ويفضل تروحون للحبة اللي بعدها وماتضيعون وقتكم. يفضل تجمعون كم شخص يساعدكم في التقشير هذا أفضل حل الصراحة.

 

أول خطوة عشان نقشر أبو فروه هو إننا نسوي بطرف سكين حاد علامة X على الجهة المسطحة منه. نستخدم هنا راس السكين بس ونسوي فتحة في القشره الخارجيه بدون ما نوصل للحم داخل. هذي الحركة تستخدم عشان ما ينفجر علينا إذا جينا نقشره وعشان تكون مكان نبدأ منه في التقشير بعدين.

 

 

الحين نسلق ٥ حبات أبو فروه تقريبا في مويه مغليه دقيقتين أو ثلاثه كافيه بعدين نطلعها ونبدأ نقشرها وهي حاره قبل لا تبرد، إذا بردت بتلصق القشره الداخلية عليها وعشان كذا نسويها على دفعات صغيره. فيه ناس يستخدمون طريقة ثانيه للتقشير بإنهم يحطون أبو فروه في الفرن أو على جمر وهذي طريقة جيده لو كنا نبي ناكله بس موب للمارون جلاسيه كونه ينشفه وعشان كذا نسلقه هنا.

 

 

نحط الحبات اللي نقشر في صفايه معدنيه تكفي داخل قدر عندكم.

 

 

الخطوة الثانية : طبخ أبو فروه :

 

هذي الخطوة جدا مهمة ومهم إننا نسويها صح بعد. هذي الخطوة لها أثر جدا كبير على قوام وشكل المارون جلاسيه بعدين وهي اللي كانت تسبب تكسر الحبات عندي أول. زي ما ذكرت فوق الكستناء مليان نشا و النشا لازم ينطبخ قبل نقدر نسوي فيه أي شي ، إذا ما أنطبخ أبو فروه للدرجة المناسبه ماراح يكون لين زي ما نبي ولا راح يشرب الشيره بعدين زي مانبي. أغلب الوصفات الموجوده تهمل هذي الخطوه وتطلب مننا نسلق أبو فروه في مويه مغليه كم دقيقه بس. حسب ما فهمت الغليان هو سبب إن أبو فروه يتكسر معنا وطبخه لدرجة أقل من المطلوب بيخليه هش وسهل يتكسر بعدين وعشان كذا هذي الخطوة مهمه.

 

نحط الصفايه اللي فيها أبو فروة داخل قدر يكفيها ونزيد عليها مويه إلين نغطي الصفايه و أبو فروه ب ٢ إنش تقريبا. نحط القدر عالنار ونطبخه إلين يوصل غليه بعدين ننزل الحراره ونخليه يطبخ على غليه جدا جدا هاديه.

 

 

نطبخ أبو فروه إلين ما نقدر ندخل عود أسنان في قاعدة الحبة ونلاقيه يدخل بسهولة وبدون ما تنكسر الحبة. الطبخ بياخذ من ٤٥ دقيقه إلى ساعتين حسب كمية أبو فروه ونوعيته. يفضل تجربون الحبات اللي ما يكون شكلها حلو لأن وقت التجربه كثير من الحبات راح تنكسر.

 

بعد الطبخ نطفي النار ونشيل الصفايه من القدر ونخليها عالجنب إلين نسوي الخطوة اللي بعدها.

 

 

 

الخطوة الثالثة : عملية التسكير أو التلبيس :

 

الحين خلص الجزأ الصعب من الموضوع كله الباقي كله تافه.

 

في نفس القدر اللي أستخدمنا في الخطوه حقت الطبخ (بعد ما ننظفه طبعا) نحط ٧٥٠ جرام من السكر مع المويه و الفانيلا ونخليه يوصل غليه بعدين نخليه يغلي دقيقتين تقريبا. الحين ننزل الحراره لأقل شي ونحط الصفايه بأبو فروه المطبوخ اللي داخلها داخل الشيره ونخليهم يطبخون دقيقه بس بعدين نطفي النار ونحط القدر عالجنب ٢٤ ساعة.

 

* اليوم الثاني :

 

بعد ٢٤ ساعة من الخطوة الأخيره نشيل الصفايه من القدر ونضيف ١٢٥ جرام سكر ونخلي الشيره تغلي من جديد. بعد ما توصل غليه نخليها تطبخ لمدة دقيقه وحده بس بعدين نطفي النار ونرجع الصفايه في الشيره من جديد ونخليها ٢٤ ساعة ثانيه.

 

* اليوم الثالث و الرابع و الخامس :

 

نكرر اللي سوينا في اليوم الثاني وبنفس كمية السكر كل ٢٤ ساعة نعيد نفس العملية.

 

* اليوم السادس :

 

اليوم السادس نعيد نفس العملية بعد بس هذي المره نحط ٢٥٠ جرام سكر بدال ١٢٥ زي الأيام اللي قبل ونتركه ٢٤ ساعة.

 

* اليوم السابع و الأخير :

 

بعد ٢٤ ساعة من الخطوه الأخيره نكون خلصنا عملية التسكير.

 

الخطوة الرابعة : التجفيف :

 

نشيل حبات المارون جلاسيه من الشيره شوي شوي (لاترمون الشيره !!) ونحطها على صينية فرن مغطيه بسيلبات أو ورق بارتشمنت أو أحسن بعد نحطها على شبك تبريد لو عندكم. نترك المارون جلاسيه يجف تقريبا ساعة.

 

 

الخطوة الخامسة و الأخيرة : التغطية :

 

نشغل الفرن على ٤٢٥.

 

ناخذ نص كوب من الشيره ونضيف عليها السكر البودرة ونطبخها عالنار إلين يذوب السكر تماما بعدين بإستخدام فرشه ندهن حبات المارون جلاسيه بهذا الخليط ونحاول نغطيها فيه قدر الإمكان. نحط الصينيه أو شبك التبريد في الفرن ٣٠ ثانيه بس إلين تجف التغطيه اللي عليه لا أكثر.

 

الحين المارون جلاسيه جاهز حطوه على ورق حق كب كيك و أحفظوه في علبه تتقفل بإحكام ١٠ أياما تقريبا. الشيره الباقيه لاترمونها !! الشيره هذي جدا جدا لذيذه وبتعيش شهور في الثلاجه. أستخدموا الشيره زي ما تستخدمون أي شيره ثانيه أو عسل للحلويات ، صبوها على البانكيك أو الوافل أو الفرينش توست ، سووا فيها سوربيه أو حتى أستخدموها كتغير عن الشيره اللي دايما تستخدمون للحلويات الشرقيه زي الكنافه و البسبوسه نكهة الفانيلا و أبو فروه يمشي معاهم بشكل جدا رهيب.

 

About admin

Leave a Reply

Your email address will not be published. Required fields are marked *

*