Wednesday, September 20, 2017

طريقة عمل مكعبات الليمون بعشبة الليمون و جوز الهند بالصور

المقادير :

القشرة :

كوب ونص طحين

كوب جوز هند محلى مبشور ( نارجيل )

١/٢ كوب سكر بودرة

أصبع ونص زبدة دافيه

١/٢ ملعقة صغيرة ملح

الحشوة :

كوب وربع سكر

٤ عيدان من عشبة الليمون Lemongrass

٥  ملاعق كبيرة عصير ليمون

٣ بيضات

١/٤ كوب طحين

* في حال ما توفر جوز هند محلى ممكن يستبدل بجوز هند غير محلى

* عشبة الليمون متوفرة في السعودية في كل سوبرماركت في قسم الثلاجة. في حال ما توفر أو ما حبيتوا تستخدمونه بدلوا بداله بشر ليمونتين بشرط إنكم ما تبشرون الجزأ الأبيض المر اللي تحت القشر.

الطريقة :

نسخن الفرن ل ٣٥٠ بعدين ندهن بزبدة صينية معدنية مربعة ( أو أي شكل ) حجمها تقريبا ١٣ في ٩ إنش.

بخلاط يدوي نخلط الطحين مع جوز الهند و السكر و الملح إلين ينخلطون بشكل جيد بعدين نضيف الزبدة ونكمل خلط على سرعة بطيئة إلين تتكون كتل رطبة. الكتل راح تكون زي الرمل تقريبا بس قوامها رطب وتلصق في بعض إذا ضغطناها بيدنا.

نرص العجينة في قاعدة الصينية و شوي على الأطراف ونحاول نخليها بنفس السماكة قدر الإمكان.

ندخل الصينية الفرن إلين تصير القشرة ذهبية تقريبا ٢٥ دقيقه بعدين نطلعها من الفرن وننزل الحرارة ل ٣٢٥.

نسوي الحشوة و القشرة في الفرن. للحشوة أول شي بنسويه هو إننا نجهز الليمون جراس أو عشبة الليمون. الجزأ المستخدم من عشبة الليمون هو الثلث الأول بس اللي منتفخ. أول شي نسويه هو إننا نقطع الثلث الأول ونشيل الجذر حقه. الحين نشيل القشر الخارجي اليابس إلين نوصل للقلب بعدين نقطع القلب صغار مره.

ناخذ عشبة الليمون اللي قطعنا وندقها بالهاوند إلين تصير قطع جدا جدا صغيرة وتطلع ريحتها القوية. عشبة الليمون جدا قاسية ولا راح تذوب مع الطبخ فعشان كذا مهم إننا نقطعها قطع جدا صغيرة قدر الإمكان.

الحين في خلاط مولينكس نحط السكر مع عشبة الليمون اللي دقينا ونخلطهم مع بعض شوي ، تقريبا دقيقة. نضيف عصير الليمون ونكمل خلط دقيقة بعدين نضيف البيض ونخلط إلين يدخلون في الخليط بس. آخر شي نضيف الطحين ورشة ملح ونخلطهم شوي بس إلين يدخلون في الخليط.

نصب الحشوة في القشرة الحارة ونرجعها الفرن إلين تجمد الحشوة تقريبا ٢٢-٢٣ دقيقة. نطلعها من الفرن ونخليها تبرد في الصحن قبل التقطيع و نرشها بسكر بودرة قبل التقديم وممكن نقدمها مع كوليه فواكه أو فواكه مقطعه عالجنب لو تحبون.

هذا الحلى بيكون ألذ شي في نفس اليوم بس بيعيش تقريبا ٣-٤ أيام في الثلاجه بدون مشاكل.

About admin

Leave a Reply

Your email address will not be published. Required fields are marked *

*