Wednesday, November 22, 2017

طريقة عمل ناسي جورين بالصور

المقادير :

كوب رز بسمتي ينطبخ بعدين يتبرد تماما.

بصله أو حبتين شالوت shallot مقطعه أجنحه

فصين ثوم مقطعه صغار

بيضه

حبتين جزر مقطعه

قرنين فلفل أحمر أو أخضر حار أو حسب الرغبه

ربع كوب ربيان مقشر ومنظف

فاصوليا طازجة من النوع اللي ينوكل كامل snow peas

كيكاب مانيس ( صويا أندونيسيه )

صوص سمك ( إختياري )

بصل أخضر مقطع على زاويه للزينه

كزبره مفرومه للزينة

بيضه مقليه للزينه

* لهذا الطبق مهم إنكم تستخدمون رز بارد وعشان كذا هو ممتاز إذا كان عندكم بواقي رز. الرز الجديد بيتكسر بسهوله وينعجن مع الطبخ. الكمية اللي حاط تقريبيه تقدرون تسوونه بأي كمية رز باقيه.

* الشالوت للي ما يعرفه هو يجي زي البصل الأحمر بس صغير. هو تقريبا خليط بين البصل و الثوم في الشكل و الطعم لأنه يجي زي البصل له حلقات وزي الثوم له فصوص. الشالوت له طعم خاص فيه مختلف عن البصل.

* الفاصوليا أنواع كثير بس عموما هي ٣ تصنيفات : فاصوليا ينوكل بس حبوبها زي البازلاء مثلا ، فاصوليا تنوكل كامله زي الفاصوليا الخضراء ، وفاصوليا ينوكل الكيس اللي فيه الحبوب زي الفاصوليا اللي مستخدم هنا. كل الثلاثه ممكن تستخدم هذا الشي اللي لقيت و أحب طعمه مع الربيان بس.

* الكيكاب مانيس أو الكتشب أو الصويا الأندونيسيه هي الشي اللي أغلب الناس عندنا يسمونه صويا صوص. هو يجي ثقيل وحلو وبطعم مختلف عن الصويا اليابانيه أو الصينيه اللي تجي مالحه وخفيفه وبدون حلاوه زايده. الكيكاب مانيس أقرب للكتشب من الصويا صوص ، هي عباره عن صويا صوص بس مع سكر و ثوم و بصل و بهارات زي اليانسون و القرفه و الكتشب عباره عن طماط مع بصل وسكر وبهارات. الكيكاب مانيس ضروري لهذا الطبق عشان يعطيه النكهة الأندونيسيه المميزه.

الطريقة :

الناسي جورين مطبوخ بطريقة القلي السريع أو الستير فراي stir fry. الستر فراي هي طريقة طبخ صينيه تستخدم حراره عاليه مع تحريك الأكل بسرعه وفيها ينطبخ الأكل في دقايق بس يعني هي موب قلي قلي بالمعنى المعروف. إذا عندكم المقله الصينيه هذي بتسهل عليكم شغلكم كثير كون شكلها عملي لهذا النوع من الطبخ بس إذا ما عندكم تقدرون تستخدمون أي مقله عاديه ثانيه بشرط تكون كبيره مره عشان تسمح لتحريك الأكل بسهولة.

الشي الثاني اللي لازم تنتبهون له في الستر فراي هو إن كل شي لازم يكون مجهز وقريب منكم قبل ما تبدون تطبخون لأن أول ما تبدون ما تقدرون توقفون. يعني البصل والثوم و الجزر يكونون مقطعين وجاهزين و الربيان منظف و الفاصوليا مغسوله و الزينه حتى مقطعه وجاهزه و الصوصات قريبه منكم، كل شي بيصير بسرعه وما ينفع توقفون وتروحون تقطعون بصل أو جزر و المقله عالنار.

الشي الثالث و الأخير وهو عن ترتيب الأكل. في الستر فراي ترتيب الأكل يكون حسب الوقت المطلوب لطبخه يعني نطبخ المواد اللي تحتاج وقت أطول في البدايه وبعدين اللي بعدها وبعدين اللي بعدها وكذا.

نسخن المقله على حراره أعلى من وسط بشوي ونخليها تحتر شوي. بعد ما تحتر نحط شوي زيت وبعدين البصل أو الشالوت و الجزر ونخليهم يطبخون إلين يبدأ الشالوت يقلب ذهبي من الأطراف ويبدأ الجزر يصير لين بعدين نحط الفلفل الحار و الثوم ونطبخه شوي إلين تطلع ريحته. نزيد شوي زيت لو إحتاج وبعدين نحط الربيان و الفاصوليا مع رشه فلفل ونطبخهم إلين يقلب الربيان برتقالي، كل هذا يصير مع التحريك بملعقة طول الوقت. الحين نكسر البيضه فوق المقادير ونحط الرز البارد عليها علطول ونقلب كل شي مع بعض ونطبخ الرز إلين يرجع يحتر من جديد. الحين نحط شوي صوص سمك وشوي كيكاب مانيس ونقلبه مع الرز ونذوق ونعدل الطعم إلين نوصل للنكهة اللي نبي ويقلب الرز ذهبي. نشيل المقله من النار ونحط الكزبره و البصل الأخضر ونقلبه مع الرز.

About admin

Leave a Reply

Your email address will not be published. Required fields are marked *

*