Wednesday, September 20, 2017

طريقة عمل صاج بانيير بالصور

المقادير :

وصفة من البانيير أو قطعة جاهزة وزنها تقريبا ربع كيل. مقطعة مكعبات كبيره.

سمن أو زيت نباتي

نص كيلو سبانخ مغسول

ملعقة صغيرة بذور كمون

بصلة مقطعه صغار

٣ فصوص ثوم مقطعه صغار

زنجبيل مقطع صغار مره بنفس كمية الثوم ( تقريبا ملعقتين كبار )

حبتين فلفل أخضر حار مقطع صغار ( أو حسب الرغبة )

نص ملعقة صغيرة كركم

نص ملعقة صغيرة كزبرة مفرومة

رشة قرفة مطحونه

رشة فلفل أحمر مطحون

ربع كوب كزبرة مفرومه

جارام ماسالا ( خلطة بهارات هنديه تنباع جاهزة )

ربع كوب زبادي كامل الدسم

ربع كوب كريمة

* تقدرون تستخدمون جبنة كوتاج أو حلوم أو حتى توفو بدال البانيير.

* تقدرون تستخدمون أو تخلطون أنواع ورقيات ثانيه مع السبانخ. هذي أكله ثانيه يسمونها بالاك بانيير palak paneer وهي بالضبط نفس الشي بس بإستخدام ورقيات ثانيه غير أو مع السبانخ.

* كمية الفلفل اللي حاط جدا بسيطة ومالها أي حراره قويه في الطبق إذا تحبون الأكل حار زيدوا الكمية و إذا تبون أقل أو بدون بعد ينفع.

الطريقة :

أول شي نسويه نغسل السبانخ. بعد ما نغسلها نسخن قدر عريض على حرارة أعلى من وسط بشوي بعدين نحط السبانخ مع رشة ملح بدون زيت أو أي شي ثاني ونغطي القدر ونطبخها إلين تذبل تقريبا ٥ دقايق. السبانخ هنا راح تنطبخ بالبخار اللي بيطلع من المويه اللي عالقة فيها وقت الغسيل. بعد ما تذبل نشيلها من القدر ونحطها في حمام ثلجي عشان نوقف عمليه الطبخ ونثبت اللون. الحين نفرم السبانخ بسكين ونحطها عالجنب. فيه ناس يحبون يفرمون السبانخ ويخلونها ناعمه مره وفيه ناس يستخدمون الخلاط لهذي العمليه ، المسألة راجعتلكم وكيف تبون قوام الكاري في الأخير.

الحين نسخن القدر من جديد على حرارة وسط ونخليه يسخن شوي بعدين نحط شوي زيت و بعدين البانيير مع رشة ملح وفلفل ونخليه يتحمر مع التحريك من وقت لوقت إلين يكونلنا لون ذهبي حلو على كل الجهات ( أنتبهوا لا تخلونه ينحرق ). بعد ما يتحمر نشيله ونحطه عالجنب إلين نسوي الكاري. تحمير البانيير خطوة إضافيه بس راح تعطي الكاري و البانيير طعم رهيب.

الحين نرجع القدر عالنار على حرارة هاديه ونحط السمن مع حبوب الكمون و البصل ورشة ملح ونطبخ البصل إلين يذبل. بعد ما يذبل البصل نحط الثوم و الزنجبيل و الفلفل الأخضر و نطبخهم إلين تطلع ريحتهم بعدين نحط الكزبرة و الكركم و القرفة و الفلفل الحار و شوي جارام ماسالا . الحين نرجع السبانخ و البانيير للقدر ونحط الكزبرة ونطبخهم شوي مع بعض بعدين نحط الكريمة و الزبادي ونطبخهم بدون ما نخلي الخليط يغلي ( عشان لا تتكتل الزبادي ) إلين يتمازجون مع بعض. نذوق الكاري ونوزن الطعم بإننا نزيد ملح وفلفل و ليمون و جارام ماسالا حسب الرغبة.

About admin

Leave a Reply

Your email address will not be published. Required fields are marked *

*