Saturday, September 23, 2017

طريقة عمل بورشت بالصور

المقادير :

٤ ملاعق كبيرة دهن بيكون ( أو زيت زيتون إذا ما تبون )

بصلة كبيرة مقطعة صغار

عود كرفس مقطع صغار

تقريبا ٧٥٠ جرام بنجر مقشر ومقطع مكعبات صغيرة ( تقريبا ٥ حبات وسط )

٧ أكواب مرق دجاج ( الطريقة في الرابط )

٣ ملاعق كبيرة خل عنب

ملعقة كبيرة خل بلسمك

ورقة غار

سيقان بقدونس

حبة جزر كبيرة مقطعة مكعبات

حبة بطاطس كبيرة مقطعة مكعبات

٤ ملاعق كبيرة شبت مفروم

ملح وفلفل أسود

ساور كريم للزينة ( إختياري )

بيكون مقلي للزينة ( إختياري )

* دهن البيكون بيعطي طعم لحم مع دخان رهيب مع الشوربة و مع البنجر. تاخذون شرايح البيكون وتطبخونها على حرارة وسط بدون زيت في مقلة تيفال عادية إلين ينزل الدهن منها ويصير البيكون يقرمش ( لاتخلون البيكون ينحرق ! ) تاخذون الدهن وتستخدمونه مع الشوربة و البيكون نفسه تقدرون لو تبون تقطعونه وتقدمونه فوق الشوربة في الأخير كزينة.

* البنجر بيصبغ كل شي يلمسه وصعب يروح اللون فإذا جيتوا تقشرونه أفضل حل إنكم تلبسون قفاز إذا خايفين على لون يدكم. إذا جيتوا تختارون بنجر أختاروا الحبات اللي تكون قاسية وثقيلة مقارنة بحجمها.

* المرق وجودته ممكن تكون الفرق بين شوربة رهيبة وشوربه عادية. تقدرون تستخدمون مويه بس الطعم راح يكون باهت شوي وممل.

* الخل هنا ضروري، الخل يتفاعل مع الصبغة الحمراء في البنجر ويعطي لون أحمر قوي بدال ما يقلب على رمادي مع الطبخ الطويل.

الطريقة :

نطبخ البصل و الكرفس في دهن البيكون ( أو الزيت ) مع رشة ملح على حرارة هاديه إلين يذبل ويصير البصل شفاف. بعد ما يذبل نحط البنجر ونطبخه شوي ( تقريبا دقيقتين ) بعدين نحط المرق و سيقان البقدونس وورق الغار و خل العنب وخل البلسمك ونخليهم يغلون على غليه جدا خفيفه مع رشة ملح وفلفل أسود. نخلي الشوربة تطبخ ( بدون غطاء ) تقريبا ٣٠ – ٤٥ دقيقة  أو إلين يستوي البنجر ويصير لين . بعد ما يستوي البنجر نحط الشبت و الجزر و البطاطس ونطبخهم إلين ما يستوون وتصير الخضار لينه تقريبا ٥ – ١٠ دقايق .

نطحن الشوربة في خلاط على دفعات بعدين نرجعها للقدر ونذوق الملح و الفلفل الأسود و الخل ونعدل حسب الرغبة ونعدل قوام الشوربة بإننا نضيف زيادة مرق أو مويه إلين توصل للقوام اللي نبي. هذي الخطوة إختيارية ، طحن الشوربة مسألة شخصية زي ما قلت في المقدمة حقت الموضوع تقدرون تخلونها زي ما هي بدون طحن يعني بس تذوقون وتعدلون الطعم بعدين تقدمونها أو تطحنونها الخيار راجعلكم.

نزين الشوربة بشوي ساور كريم وورق شبت والبيكون المقلي لو حبيتوا ونقدمها مع خبز عالجنب.

About admin

Leave a Reply

Your email address will not be published. Required fields are marked *

*