Thursday, September 21, 2017

طريقة عمل جرك تشكن بالصور

المقادير :

١/٢ كوب خل ملت أو تفاح. (لأ ما ينفع خل عادي)

بشر وعصير نص ليمونه خضراء

١٠ حبات بصل أخضر مقطعه قطع كبار

٤ فصوص ثوم

ملعقتين كبار زعتر بري thyme مجفف أو طازج . ( يختلف عن الأوريجانو هذا شي وهذاك شي )

حبتين فلفل هابانييرو  أو سكوتش بونيت

١/٢ كوب زيت

٤ ملاعق صغيرة بهار حلو allspice

٤ ملعق صغيرة زنجبيل مطحون

ملعقتين صغار جوزة طيب

ملعقتين صغار ملح

ملعقتين صغار فلفل أسود

ملعقتين كبار سكر بني

6 فخوذ ورجول دجاج.

للصوص :

نص كوب كتشب

٣ ملاعق كبيره صويا صوص.

* تقدرون تستخدمون صدور دجاج أو أي لحم ثاني تبون بعد.

* المكونات كلها أعتقد سهلة ومتوفرة الشي الوحيد اللي يمكن ما تلاقونه هو فلفل الهابانييرو. فلفل الهابنييرو واحد من أحر أنواع الفلفل في العالم بس تحت هذي الحرارة في حلاوه وطعم فواكه حلو ومميز. فيه مقياس لحرارة الفلفل إسمه “مقياس سكوفيل” Scoville scale و الهابانييرو تتراوح حرارته من ١٠٠٠٠٠ – ٣٥٠٠٠٠ وحده. عشان تتخيلون الحرارة الفلفل البارد العادي مقياسه صفر سكوفيل و فلفل حار نسبيا زي الهالابينو حرارته ٢٥٠٠ – ٨٠٠٠ هههه يعني تقدرون تتخيلون الفرق في الحرارة .

هذا هو شكل الفلفل صغير ومجعد و ألوانه تتراوح بين الأحمر و البرتقالي. فيه أنواع فلفل كثير تشبهه زي فلفل الكرز اللي يجي أملس بس هذاك أبرد بكثير. في حال لقيتوا هذا الفلفل أستخدموا لوح تقطيع ثاني له و يفضل لو تلبسون قفاز و أنتم تستخدمونه لأن لو قطعتوه ممكن يحرق الجلد أو العين. في حال مالقيتوا هذا النوع أستخدموا أحر أحر فلفل تلاقونه ويفضل لو يكون من الأنواع الحمراء ( فيها طعم حلاوه عكس الخضراء ) بس زيدوا الكمية شوي. كقاعدة عامة كل ماكان الفلفل نحيف أكثر و أقصر و مجعد أكثر كل ماكان أحر ( ولو إن هذا الفلفل مخالف لكل هذي النقاط عشان كذا قلت قاعدة عامة بس لها شواذ ).  داري إن فيه ناس ما يحبون الأكل حار مره وتقدرون تسوون الأكل بدون الفلفل بس تذكروا الأكل الجامايكي أكل حار وحاولوا لو مره وحده تجربونه زي ماهو.

الطريقة :

للتتبيلة :

حطوا الخل مع كل مكونات التتبيلة الباقية في خلاط مولينكس و أخلطوه إلين يعطيكم تتبيله. ذوقوا التتبيلة وعدلوا عليها حسب الرغبة. خذوا ملعقتين كبار من التتبيله عالجنب عشان نسوي فيها الصوص بعدين. حطوا الدجاج في صينية ( أو كيس يتقفل لو تحبون ) وصبوا فوقه التتبيلة وأخلطوه معها زين بعدين غلفوه وحطوه في الثلاجه 4 ساعات عالأقل.

للصوص :

أخلطوا مقادير الصوص مع بعض اللي هي الكتشب و الصويا و الملعقتين من اللتبيلة اللي حفظناها وحطوه عالجنب.

طبخ الدجاج :

الدجاج الحين متبل وجاهز وممكن ينطبخ بكذا طريقة. تقدرون تشوونه عالفحم لو تبون أو بإستخدام شوايه حديد أو حتى تحمرون الدجاج في الفرن.  ما أنصح أبدا بالشوايات الكهربائية لأن جربت كثير منها وعمرها عمرها ما توصل حرارة كافيه وغالبا توزيعها للحرارة سيء يعني تسخن في مناطق أكثر من مناطق. أنا بوريكم طريقتين هنا وجربوا اللي تعجبكم.

قبل الطبخ بساعة عالأقل طلعوا الدجاج من التتبيله بعدين جففوه بمناديل رول ( مهم عشان يتحمر وعشان الجلد يصير يقرمش وبعد عشان ما يطلع دخان كثيرويمكن ينحرق إذا لمس المقله ) و رشوه بشوي ملح  عالجهتين.

بالفرن :

سخنوا الفرن ل 350 .

سخنوا مقله حديد أو ستانلس على حرارة أعلى من وسط بشوي وخلوها تسخن شوي بعدين حطوا شوي زيت نباتي. حطوا الدجاج بحيث يكون الجلد على تحت و أطبخوه إلين يتحمر الجلد شوي بعدين أقلبوه وحمروا الوجه الثاني. الحين لو المقله حقتكم من النوع اللي ينفع يدخل الفرن ( يعني ما يفيها بلاستك ) حطوا المقله كلها داخل الفرن. لو كان فيها بلاستك خذوا الدجاج وحطوه في صينية فرن ودخلوه الفرن. خلوا الدجاج في الفرن إلين يستوي من جوا ولا دقيقه أكثر من كذا عشان ما ينشف. تعرفون إن الدجاج إستوى بإنكم تخرمون خرم صغير بالسكين في أسمك مكان في الفخذ إذا كان فيه لون وردي أو طلعت مويه حمراء يعني الدجاج لسا ما أستوى أو تقدرون تقيسون الحراره بميزان ومتى ما وصلت 165 يعني أستوى.

أو لو تبون أسهل حطوا الدجاج في صينية فرن على حرارة 425 إلين ما يتحمر وينطبخ من داخل زي ما شرحت فوق. الدجاج بيكون ممتاز بس الجلد ماراح يكون متحمر بنفس الطريقة ولا راح يكون يقرمش زي إذا كان مشوح أول بس الخيار راجعلكم.

بالشواية :

نسخن شواية حديد ( أو فحم أو غاز ) على حرارة أعلى من وسط بشوي. بعدين ندهن الدجاج بشوي زيت نباتي ونحطه عالشوايه ونطبخة إلين يتلون الوجه الأول بعدين نقلبه ونكمل طبخ الوجه الثاني إلين يستوي الدجاج من جوا زي ما شرحت فوق.

بعد ما يستوي الدجاج لازم نريحة بإننا نحطه في صحن ونغطيه بقصدير مخروم . نخلي الدجاج يرتاح ثلث وقت الطبخ تقريبا. ترييح اللحم جدا مهم ، ترييح اللحم بيخلي البروتين حق اللحم يرتاح و المويه ترجع تتوزع بالتساوي في اللحم هذا بيعطي لحم رطب أكثر و لين أكثر. لو ماريحنا اللحم بنلاقي المويه نزلت كلها في الصحن بدال ما تكون داخل الدجاج.

نقدم الدجاج مع الصوص و ساور كريم ( عشان يخفف من الحراره شوي ).

About admin

Leave a Reply

Your email address will not be published. Required fields are marked *

*