Monday, September 25, 2017

طريقة عمل مجبوووووس كويتي بالربيان بالصور

المقادير .. تكفي تقريباً من خمس لست اشخاص .. والمقادير تنقسم لثلاث اقسام .. مروق المجبوس والعيش والحشوه او الحمسه او الديكور او اي شي حابين تسمونه

مقادير المروق ..

– 2 كيلو ربيان
– بصله كبيره او بصلتين متوسطين
– 4 – 6 فصوص ثوم
– عود دارسين
– ليمون اسود تقريباً ليمونتين او ثلاث حسب حجم الليمون اذا كبير او صغير
– كم حبة هيل
– مسمار حب
– فلفل اسود حب
– 1 ملعقة شاي بزار مخلوط
– نص ملعقة شاي يليللان مطحون (كزبره ناشفه)
– نص ملعقة شاي سنوت مطحون (كمون)
– ربع ملعقة شاي دارسين (عشان اذا في زفره)
– نص ملعقة شاي هيل مطحون (بعد عشان اذا في زفره)
– ملح حسب الرغبه (الملح حسب كمية العيش)
– ماي للمروق

مقادير العيش ..

– جيلتين عيش او جيلتين ونص (احنا جيلتنا الكوب او الـmug)
– بصله متوسطة الحجم
– ربع ملعقة شاي كمون
– ربع ملعقة شاي هيل
– ماي ورد
– زعفران منقع

مقادير الحشوه ..

– بصله كبيره او بصلتين متوسطين
– زبيب
– بيذان مقشر (لوز) وممكن كازو براحتكم
– ملح
– هيل
– سنوت

خلصنا من المقادير نجي الحين للطبخ

بسم الله الرحمن الرحيم

اول شي يتقشر الربيان ويتنظف وينغسل عدل .. احنا عقب مانغسله عدل بالماي ويصير الماي صافي .. نحط عليه ملح وطحين ونقلبه فيهم ونصب عليه ماي ونخليه يتنقع تقريباً خمس دقايق عشان تروح الزفره منه .. وعقب ينغسل ومن الطحين وينحط في مشخاله ..

في جدر نحط شوية زيت .. ونقطع البصل ونحمسه

لين يصير لون البصل ذهبي نحط عليه الربيان ونقلبه بين الفتره والثانيه

لين يتغير لون الربيان نحط عليه البهارات الحب والثوم نقطعه ونحليه صحيح مب مشكله والبهارات المطحونه ونقلبه ونخليه شوي يتشرب البهارات

عقبها نصب عليه الماي .. الماي حسب كمية العيش والعيش اللي يعندكم اشكثر يستخدم ماي .. احنا نحط على كل جيلة عيش كوب ونص (بنفس الكوب اللي جلنا فيه العيش) ونزيد عليه تقريباً كوب او كوب ونص عشان اللي بيتبخر

ونخليه تقريباً عشر دقايق او ربع ساعه

 

طبعاً الجدر يتغطى

في الوقت اللي نخلي فيه الربيان على النار نبدا نشتغل على العيش

في طابي نحط فيه شوية زيت ويتقطع البصل صغير وينحمس لين صار لونه ذهبي نحط عليه البهارات مالته ونقلبه

لين طاف الوقت اللي حددناه للمروق نكشف الجدر ونحط عليه البصل اللي حمسناه ونخليه شوي

العيش طبعاُ مغسول ومنقع بفتره (هالشي يعتمد على نوعية العيش)

ينشخل العيش وينحط فوق الربيان فالمروق ويتقلب عشان ينخلط مع الربيان ويتغطى طبعاً العيش بينجبس مابينشخل ..

لين نشف ماي العيش نصب عليه الزعفران اللي تنقع وماي الورد ونقصر عليه ونحط تحته تنكه او شي عشان يتسكر

وبندا نسوي الحشوه

في طابي نحط فيه شوية زيت وبصل مقطع مكعبات ونحمسه .. لين يصير لونه ذهبي نحط عليه البيذان ونخليه شوي معاه يتقلى

عقب نحط عليه الزبيب والبهارات والملح ونقلبه ونخليه على صوب

وعقب مايستوي العيش ننجبه ونزينه بالحشوه اللي سويناها

وطبعاً بما ان احنا قلنا كويتي معاناها في دقوووووووووووووووس وذي الصحن لاول رد

ملاحظه: الطريقه تقريباً نفسها للحم والدياي بس في اختلافات بسيطه ان شاءالله اذا ربي كب انزلها لكم

About admin

Leave a Reply

Your email address will not be published. Required fields are marked *

*