Monday, October 23, 2017

طريقة عمل صابلي البيضة بالصور

المقادير:
250غ مرقرين بحرارة الغرفة
60غ سكر رطب
100غ نشا
بيضة+صفار بيضة
فاني
نصف م ص خميرة مانكثروش حتى الحلوى تحافظ على شكلها
فرينة
للحشو:
انا استعملت حلوة الترك ممكن نعمل نواد كوكومرحي ونلمه بالمعجون ونضيفله ملون اصفر حتى ياخذ لون مح البيضة.
الطلية:

سكر رطب من النوع الجيد انا استعملت المرجان
ماء معدني
ماء الزهر
عصير ليمونة
كمية من النيسكافيه مذوبة في الماء
ملون برتقالي

نحتاج ايضا الى
ملمع فضي
ورق الطهي لصنع عش البيضة

الطريقة:

نحضر عجينة الصابلي
نخلط المرقرين مع السكر بالخلاط ثم نضيف البيضة وصفار البيضة ونحرك ثم الخميرة والفاني والنشاء ونلم

بالفرينة بلا مانعجن حتى نتحصل على عجينة متماسكة ماتكون طرية ماتكون يابسة هكذا

نشكل كويرات من العجينة بحجم 30غ ولي حابة حجم صغير تعمل 25غ نحشيها بشوية من حلوة الترك نعاود نغلقها ونكورها

لتشكيل هذا الحلوى يلزمنا هذا النوع من لي مول راه متوفر في السوق ولي ما عندهاش ممكن تعوضه بعلبة بيضة شكولة كيندر

نحط داخله كيس بلاستيكي حتى يسهل نزع الحلوى بسهولة

نحط الكويرات المحشية داخل المول ونضغط عليها حتى تاخذ شكل البيضة

نحطها في الصينية

ندخلها للفرن تطيب على 180د وهذا شكلها بعد ماطابت

نخليها تبرد تماما من بعد نحضر الطلية

الان نقوم بتحضير الطلية
هذا المرة عملت الطلية بدون بياض بيض لان كيما سبق وخبرتكم ان هو لي يخليها تبس بالخف

في اناء نحط السكر الرطب يكون مغربل ونضيفلو ماء الزهر حتى نتحصل على عجينة نعجنها شوية باليد

نضيف عليها عصير ليمونة ونحرك باليد

نضيف شوية من الماء المعدني حتى نتوصل للقوام المناسب

بعدها نضيفلها كمية من النسكافيه المذابة في القليل من الماء وشوية ملون برتقالي حتى نتوصل للون المناسب للبيضة هكذا

في هذا النوع من الحلوى لي يذوب في الفم من الاحسن ناخذ مشبك ونحط داخل صينية نحط حبات الحلوى فوق المشبك ونهز الطلية بالملعقة ونحطها فوق الحلوى ونحرك المشبك حتى تهبط كمية الطلية الزائدة طبعا نعاود نستعملها مرة اخرى

نترك الحلوى تنشف تماما من بعد نلمعها بالقليل من الملمع الفضي
حتى نزيد من جمالية الحلوى وتظهر وكانها بيضة حقيقية نعملها اعشاش
ناخذ ورق الطهي ونفوته في الماشينة في جهة الرشتة هكذا

نحط الحلوى في ليكيسات ناخذ كمية من الورق لي حضرنا نلفه حول نفسه من بعد نحط ساير داير على البيضة ونقدمها بالصحة والهناء

About admin

Leave a Reply

Your email address will not be published. Required fields are marked *

*