Friday, September 22, 2017

طريقة عمل صوصات الفواكه ( الكوليه ) .. بالصور

كثير ناس سألوني عن صوص فراولة أو صوص توت أو تغطيه تشيز كيك لذيذه و هذي كلها عبارة عن صوصات فواكه بسيطة وسهلة وما تحتاجون أي وصفه عشان تسوونها. الكوليه عبارة عن صوص جدا بسيط ممكن يكون حلو ( مشمش ، توت ، عنب ، فراولة ، توت أزرق ، كيوي .. إلخ … ) أو مالح ( فلفل أحمر ، طماط .. إلخ .. ) .. الكوليه المالح ماراح أتكلم عنه الحين كونه شوي متشعب .الكوليه الحلو إستخداماته ما تخلص ، سواء صوص فوق إسكريم مثلا أو تشيز كيك أو حتى كيك عادي أو باوند كيك أو فرينش توست أو بان كيك أو كريب  . ممكن بعد يستخدم كزينة للحلويات ، لو إنحط في علبة تنضغط كمية الأشكال و الكتابات اللي ممكن تسوونها ما تخلص . بإختصار شديد أي شي تبون تدخلون عليه طعم فاكهة بيكون حلو معه.

 

 

علبة ممكن تستخدم لحفظ الكوليه و الكتابه بسهولة

 

الكوليه هو ببساطة شديده صوص فواكه متجانس القوام . ممكن يتسوى بأي فاكهة أو خلطة فواكه سواء كانت مجمده أو طازه. الكوليه صوص ممتاز كونه يعطي طعم الفاكهة – أو مجموعة الفواكه  – المستخدمه بشكل واضح وقوي . الكوليه جدا سهل ، ماياخذ أي وقت ، ويعيش وقت طويل في الثلاجه .

 

 

الطريقة

 

 

الكوليه يتكون في الأساس من فاكهة وسكر بودرة بس . الإضافات الثانيه طبعا ممكنه ، العسل أو الميبل سيرب مثلا ممكن يتبدل جزأ منها بالسكر ،  البهارات و الأعشاب أو الحوامض زي الليمون أو البرتقال أو غيره ممكن تستخدم عشان تدخل نكهات إضافية للكوليه حقنا بس عموما كلها موب ضرورية . الألوان بعد ممكن تستخدم عشان تعزز لون الفواكه الطبيعي . لاحظوا كلمة تعزز بس موب تغير يعني ما أسوي كوليه كيوي و أحط لون برتقالي بس ممكن أضيف لون أخضر عشان أخلي شكله أحلى لو أحتاج طبعا .

 

الفواكه هي أهم شي هنا . أي فاكهة ممكن تستخدم للكوليه أهم شي إنكم تفكرون في الطعم الأخير هل يمشي مع الشي اللي بتقدمونها معه ولا لأ هذا المهم . يعني ما أقدم كوليه كيوي مع باي تفاح مثلا ! لمجرد إن الشكل بيكون حلو ! هذا واحد من أكبر الأخطاء في التزيين و في الطبخ عموما .

الفواكه المجمده ممكن تستخدم في الكوليه وصراحة أفضلها على الطازه لأسباب . أول سبب هو إن الفواكه بعد ما تذوب من التجميد يطلع كثير من مويتها وهذا يسهل علينا شغلنا . السبب الثاني هو إن كثير من الفواكه موسمها جدا ضيق زي الفراولة مثلا و التوت هذي طعمها يتغير بشكل كبير إذا كانت برا موسمها بس الفواكه المجمده في الغالب تكون مجمده في عز موسمها وعشان كذا أحيانا هي أفضل من الطازه . السبب الثالث هو إن كثير من الفواكه تكون غاليه مره برا موسمها ومكان إنتاجها وكوني بخلطها بسكر وش الفايده إني أشتريها طازه ؟

 

كمية السكر للفواكه هي المهمة هنا . أستخدموا تقريبا نص وزن الفواكه سكر مطحون يعني لو عندنا مثلا ٢٠٠ جرام فراولة نستخدم ١٠٠ جرام عالأقل سكر . بعض الفواكه راح تحتاج سكر أكثر في حال كانت حامضة شوي .

 

 

الطريقة 

 

بنسوي صوص فراولة .

 

١ـ نحط كرتون فراولة مجمده ذايب مع كوبين سكر المطحون و عصرة ليمون ( تطلع طعم الفراولة ) في قدر ونسخنها على حرارة وسط ( لاحظوا بدون أي ماء )

 

٢ـ بعد فترة السكر بيسحب المويه من الفراولة وبيبدأ يسيل ويغلي . خلوه يغلي دقيقه بعدين طفوا النار .

٣ـ حطوا الفراولة في خلاط و أخلطوها إلين تصير ناعمه مره . خلوها تبرد وقدموها بس … لو كانت الفواكه المستخدمه تحتاج تصفيه مثلا فيها حبوب أو غيره صفوها بعدين بردوها .

 

 

الحفظ

 

 

الكوليه ممكن ينحفظ في الثلاجه حوالي أسبوعين أو أكثر أو يتفرز ٦ شهور تقريبا . أهم شي تنتبهون له هو إن بعض الفواكه راح تجمد شوي في الثلاجه ، زيدوا عليها شوي مويه عشان ترجع زي ماكانت . 

 

About admin

Leave a Reply

Your email address will not be published. Required fields are marked *

*