Tuesday, September 19, 2017

طريقة عمل معكرونة بالجبنة بالصور

 

الماك آند تشيز طبق أمريكي شعبي ماله أي علاقة بإيطاليا . هو عبارة عن صينية مكرونه أكثر من كونه طبق باستا (http://manalkitchen.com/?p=270 ). الأكله تتكون من مكرونه مسلوقه مخلوطه مع صوص يسمونه مورنيه (http://manalkitchen.com/?p=268)  اللي هو واحد من تفرعات الباشاميل . هذي المكرونه لها مليون تفرع وتفرع وكل يوم يطلع أكثر و أكثر .. اللي دخل عليها مكونات غاليه مثل الفقع و اللوبستر و اللي سواها بلمسات صينية وهنديه و يابانيه و اللي يسويها بالبيكن و اللي يسويها بأنواع أجبان نادرة وغريبه … و كل شخص تقريبا عنده نسخه غير للأكله هذي..

.

اليوم ماراح أتكلم عن أي تفرعات اليوم مسوي الوصفه الكلاسيكيه بنفس المقادير الموجوده في العادة في كل ماك آند تشيز . بس هذا ما يمنع إن فيه تفاصيل مهمه تخلي حتى أبسط الأشياء مميزه إذا تطبقت صح.

.

المقادير :

.

ربع كيلو تقريبا مكرونه “ماكاروني” أو اللي يسمونها أكواع elbow macaroni .

٣ملاعق كبيرة زبدة

تقريبا ٣ ملاعق كبيرة طحين

ملعقة كبيرة خردل بودرة .. ( لا تبدلون بخردل عادي ) .

٣أكواب حليب كامل الدسم .

١/٢كوب بصل مقطع صغار .

ورقة غار

رشة جوزة طيب ( إختياري )

فص ثوم كامل

١/٢ملعقة صغيرة بابريكا

بيضه

٣٥٠جرام تقريبا جبن تشيدر حاد sharp أو mature مبشور.

ملح وفلفل أسود .

.

التغطيه :

٣ملاعق كبيره زبده

كوب بقسماط ويفضل لو كان بقسماط ياباني panko .

.

* شكل المكرونه مهم هنا. اللي ما يعرف شكل المكرونه اللي أقصد يكون شكلها زي الصورة اللي تحت. في حال ما توفرت أستخدموا أي شكل أسطواني ثاني زي البينني مثلا penne.

.

.

* بودرة الخردل هي عبارة عن بذور خردل مطحونه لا أكثر. متوفرة في أغلب السوبرماركتات ولو ما لقيتوها أكيد بتلاقون بذور خردل mustard seeds أطحنوها بطاحونة بهارات وخلاص.

.

* نوعية الجبن جدا مهمة هنا. تقدرون تستخدمون كذا نوع جبن : تشيدر ، جرويير ، إمنتال ، جودا ، ماسكاربوني ، فيلادلفيا ، بارمزان ، رومانو ، جرانا بادانو، بلو تشيز ، جوت تشيز أو جبنة ماعز أو أي خليط منهم. أهم شي إنكم تستخدمون جبن من نوعية جيدة وإن الصوص في النهاية يكون له نكهة جبن. أشياء زي الموزاريلا مالها نكهة قويه ولاراح تضيف أي شي للصوص. أنا حددت تشيدر حاد أو معتق mature هنا وبيضبط دايما بس لو تبون تستخدمون نوع جبن ثاني الخيار لكم. إقتراحات ثانيه رهيبة : ٣/٤ الكمية جروير و الربع الباقي بارمزان ، نص ماسكاربوني أو فيلادلفيا وربع إمنتال وربع بارمزان ، نص جودا ونص تشيدر و الخيارات الثانيه كثيرة.

.

الطريقة :

.

سخنوا الفرن على ٣٥٠ .

.

أسلقوا الباستا في قدر كبير فيه مويه مملحة كثيره على حرارة عالية . بدون أي زيت ! إذا وصلت الباستا مرحلة “ألدنتي” يعني تكون مستويه يعني مافيها طعم نشا بس لسا شوي قاسيه نشفوها و أغسلوها بمويه بارده عشان نوقف الطبخ وما تصير مطبوخه أكثر من اللازم.

.

و الباستا قاعده تطبخ نسوي الصوص. في قدر نذوب الزبده على حرارة وسط ، بعد ما تذوب نحط الطحين و الخردل ونحرك إلين يكون لنا معجون ناعم بعدين ننزل الحرارة شوي. نطبخ المعجون هذا حوالي ٥ دقايق إلين يقلب لونه أشقر شوي. الحين نرفع الحراره شوي بعدين نبدأ نضيف الحليب . نحط دفعه حليب ونحرك إلين تبدأ تغلي بعدين نحط الدفعه اللي بعدها وكذا إلين يخلص كل الحليب . نضيف البصل و الثوم وورق الغار و البابريكا و جوزة الطيب ونطبخهم على غلية جدا خفيفه ١٠ دقايق تقريبا . بعد العشر دقايق نشيل فص الثوم وورقة الغار ونطفي النار.

.

الحين نخلط حوالي ملعقتين كبار من الباشاميل على صحن صغير فيه البيضه ونحركهم مع بعض زين. بعدين نصب اللي في الصحن الصغير عالصوص ونحرك. هذي العملية مهمه كوننا لو حطينا البيضه عالصوص علطول بتتكتل بس كذا لأ . نضيف الحين ٣/٤ الجبن على الصوص على دفعات ونحرك إلين يذوب بعد ما يذوب الجبن نذوق الصوص ونزيد الملح و الفلفل حسب الرغبة . حاولوا يكون الصوص يميل للملوحة لأنه بينخلط مع الباستا.

.

.

نخلط الباستا مع الصوص بعدين نصبهم في صحن فرن . أو عدة صحون صغيرة لو تبون .بعدين نغطيها بباقي الجبن .

.

الحين نذوب الزبدة حقت التغطيه بعدين نخلطها مع البقسماط . نحط طبقة من التغطيه فوق الجبن وندخلها الفرن .

.

 

.

نخليها في الفرن إلين يذوب الجبن و تبدأ التغطيه تقلب ذهبي . حوالي نص ساعة .  نطلعها ونخليها تبرد ٥ دقايق بعدين ناكلها علطول وهي حاره .

.

 

About admin

Leave a Reply

Your email address will not be published. Required fields are marked *

*