Wednesday, September 20, 2017

طريقة عمل كرات الثلج بالصور

 

المقادير :

٣أكواب جوز هند ( نارجيل ) أو حوالي ٢٠٠ جرام للي يمشي بالوزن .

٢/٣كوب سكر أبيض

رشة ملح

بياض بيضتين

ملعقتين صغار مويه

حوالي ١٠٠ جرام شكولاته غامقة ( ٥٤٪ – ٧٢٪ نسبة كاكاو ) من أفضل نوعية تلاقونها ..

أبعدوا عن جلكسي و أبعدوا عن الشكولاته “الخام !!” أشتروا أحسن شكولاته موجوده كونه مهم هنا .. مقطعه مكعبات نص صانتي في نص صانتي تقريبا بعد كله تقريبا لا تهمكم التفاصيل هذي الحلى سهل .

لوز محمص ومقشر مقطع شرايح نحيفه ( إختياري ) .

سكر بوردة .

الطريقة :

نسخن الفرن على ٣٥٠

في جهاز تحضير طعام ( خلاط مولينكس ) نخلط النارجيل مع السكر و الملح إلين ينطحن شوي ويصير أنعم من شكله الحالي . بعدين نضيف بياض البيض و المويه ونخلطه شوي إلين يكون خليط يمسك شكله لو ضغطناه بيدنا .

 

كذا راح يكون شكل الخليط لاحظوا مفتت بس إذا ضغطتوا عليه بينعجن .

الحين نبدأ نشكل الخليط على شكل كور راح نحتاج تقريبا ملعقة كبيره من الخليط لكل كوره بس طبعا هي تعتمد على حجم الكور المطلوب .

ويمكن نحتاج نبلل يدنا لو كانت تلصق . نشكل الكور بعدين نضغط بأصبعنا ونسوي مكان للحشوة ونحط الشكولاته و شوي لوز محمص لو نبغى بعدين نقفل عليها ونرجع نكورها .

نرصها على سيلبات أو ورق بارتمشن ( اللي الناس يسمونه ورق زبده بس ورق الزبده شي مختلف ) .

 

ندخلها الفرن إلين تبدأ تقلب شوي ذهبيه من تحت بس .. بس نبغاها بيضاء يعني حاولوا ما تخلونها أكثر من اللازم . راح تاخذ حوالي ١٣-١٥ دقيقه في الفرن بس يمكن أقل ويمكن أكثر إعتمادا على فرنك . نطلعها من الفرن ونخليها تبرد تماما . نرشها بسكر مطحون لو نبغى ونقدمها .

About admin

Leave a Reply

Your email address will not be published. Required fields are marked *

*