Friday, October 20, 2017

طريقة عمل الجواكملي بالصور

الجواكمولي عباره عن صلصه منتشره في دول أمريكا اللاتينيه . أساس الصلصة هذي هو الأفوكادو مع إضافات ثانيه بس المهم هو الأفوكادو بالدرجة الأولى . الجواكمولي له إستخدامات كثير ممكن مثلا يستخدم كصوص فوق ستيك ، فهيتا، برجر ، ممكن ينحط مع السندوتشات ، أو حتى ممكن يستخدم كديب dip مع قطع خبز مثلا أو تورتيا محمصه أو مقليه . كثير ناس يسألوني عن صوصات للسندوتشات والجواكمولي خيار حلو للي يبي يسوي شي جديد ومميز وأكيد جدددا لذيذ . الجواكمولي لذيذ مع الدجاج ومع السمك ومع الربيان و الكراب و المأكولات البحريه كلها تقريبا وحتى مع الخضار عشان كذا هو إضافه حلوه وسهله الواحد يسويها في ثواني .

.

نبدأ أول شي بالأفوكادو . الأفوكادو تجي نوعيين رئيسيين تقريبا هي اللي ممكن تلاقينها في كل مكان الأول اللي هو العادي يجي شكله زي كذا :

 

والثاني يجي زي كذا :

 

.

النوع الأفضل هنا هو النوع الثاني أو اللي يسمونه هاس . وخصوصا اللي يكون إنتاج كالفورنيا هذا أفضل أفوكادو . السبب هو إنه أكثر دسم من الأنواع الثانيه وهذا يخليه ناعم مره وطعمه رهيب . بس كل الإثنين تنفع عادي .للي ماقد ذاق الأفوكادو هو فاكهه جدا دسمه قوامها زي الزبده اللينه تقريبا ( وموب غريبه عشان كميه الدهن العاليه ) . طعمها جدا خفيف بس رهيب . الأفوكادو مليان دهون صح بس كلها دهون غير مشبعه ومفيده جدا .

.

الأفوكادو في الغالب ينباع قاسي وهو يستوي في البيت زي الموز . راح يستوي في الغالب في خلال ٤-٦ أيام . ممكن تسرعون العمليه بإنكم تحطون الأفوكادو في كيس ورق مع موزه في دولاب أو كذا برا الثلاجه . تعرفون إن الأفوكادو مستوي بإنكم تضغطون عليه من فوق و المفروض ينضغط شوي بس يكون فيه شوي مقاومه يعني ما يكون لين مره .

.

الأفوكادو أول ما ينفتح ويبدأ اللحم حقه يلمس الهواء يبدأ يتأكسد بفعل أنزيل موجود فيه ويسود زي التفاح بالضبط بس راح تصير في الأفوكادو بشكل أسرع بكثير . عشان نوقف الأنزيم هذا نغطي الوجه المقطوع بعصير ليمون هذا بيوقف الأنزيم و بكذا ما يسود.

.

نفتح الأفوكادو بإننا نقسمها نصين بالطول .

.

 

.

الحين لازم نشيل البذره بدون ما نقعد نحفر حولينها زي ما ناس كثير يسوون .

.

 

.

ندخل السكين بضربه جدا خفيفه زي كذا . بعدين نلف السكين وهي بتطلع بسهوله وبدون ما نخرب شكل الأفوكادو أو نخليها تسود أسرع .

.

 

.

الحين ناخذ نص ليمونه ونمسح الوجهين المقطوعات علطول عشان ما تسود علينا .

.

خلصنا من الأفوكادو نرجع للجواكمولي . الجواكمولي في الغالب معه طماط ، بصل أخضر أو بصل أبيض ، كزبره ، فلفل حار ، ليمون أخضر ، كمون وملح وفلفل .. بس ! .

.

المقادير ( وطبعا غيروها حسب الرغبه عادي) :

.

حبة أفوكادو تشيلون اللحم منها بملعقة وتحطونه في صحن .

٣ملاعق كبيره تقريبا كزبره طازه مفرومه

٣ملاعق كبيره بصل أبيض أو أخضر

نص طماطه كبيره مقطعه مكعبات صغيره

ملعقتين كبار فلفل حار مقطع صغار بالبذور أو بدونها حسب الرغبه . لو تبين الجواكمولي حار خلي البذور أو شيليها براحتك

عصير ليمونه خضراء

رشه كمون

ملح وفلفل ..

زيت زيتون

.

الطريقة :

.

نهرس الأفوكادو بشوكه حسب النعومة اللي نبيها يكون (شخصيا أحبه شوي خشن موب مره مهروس بس حسب رغبتكم) . بعدين نحط عصير الليمون عليها ونخلط شوي . الحين نحط باقي المكونات ونخلط ونذوق إلين نوصل للطعم اللي نبي .

.

About admin

Leave a Reply

Your email address will not be published. Required fields are marked *

*