Thursday, September 21, 2017

طريقة عمل الكيك الاساسية بالفانيلا والشوكولا بالصور

اول شىء بنحضر مكونات الكيك فى درجة حرارة الغرفة
4 حبات بيض
كوب حليب
كوب الاربع زيت
ملعقة كبيرة زبدة مذابه
2 كوب دقيق
بشر ليمون وملعقة صغيرة فانيلا
بنعرف البيض انه درجة حرارته تمام اما نلاقى قطرات مياه علس سطحه ولو طلعتيه متاخر ممكن تنزليه فى مياه دافيه لدقائق وده اول اهم شىء عشان الكيك يكون ناجح

فى خفق البيض بنضيف بيضة بيضة ونضرب شويه مع نقطتين خل ونضيف الفانيلا و الوصفة فيها كوب وربع سكر ومعاكى لحد كوبين سكر حسب ما تحبيها حلوة بنضيف ربع كوب بربع كوب مع الخفق ونضرب كتير لحد ما يعمل فوم عالى جدا لونه ابيض

هنا بنضيف كمان كوب الاربع من الزيت 
ملعقة كبيرة زبدة مذابة 
كوب حليب ومهم جدا يكونو كلهم بكوب واحد لو مش هتسخدمى اكواب القياس لحد الدقيق يكون بنفس الكوب تمام

هنا ضفت بشر ليمون وممكن بشر البرتقال ونخفق حوالى 10دقائق ايديكى هتتعبك بس الكيك هتبقى جميلة

كده تمام عملت فوم كبير وجميل

هنا المكونات الجافة 
كوبين دقيق وملعقة كبيرة بيكنج بودر ورشة ملح 
هنا فى حاجتين اولهم الدقيق اللى فى الوصفة اعتمدى على عيونك يعنى مثلا ضيفى الكوبين وبعد الخفق وكله تمام شوفى قوام الكيك لازم يكون مش ثقيل قوى ولا خفيف قوى يعنى يكون اثقل من البشاميل شويه 

تانى حاجة البيكنج بودر الاول بنجربه على كوية مياه صغيرين لازم لازم يفور لانه اساس الكيك عندنا ولو فى كيك شيف بجد رائع استعملوه

هنا فى شىء مهم جدا النخل مهم جدا اننا نقلب كل المكونات الجافة سوا بعدين ننخلهم سوا 3 مرات عشان يدخلهم اكبر كميه هوا

ضيفى الدقيق على دفعات ومش هقولك بالسباتيولا وقلبى براحه وكده انا معنديش صبر للحاجات دقيق بالمضرب برده بس مهم انه يدوب وفى نفس الاتجاه ومتفضليش تضربى وتنسى نفسك بس يدوب وقفى

لو حبيتى تكون بالشوكولا كمان بس افصلى نصف الخليط وضيفى ملعقتين كبار كوكا بودر بس منخولين طبعا وبرده بالمضرب لثوانى بس يدوب

وكده الكيك بقى جاهز للاسف نسيت اصور وانا بنزلها لانى كنت اتغرقت كيك بس ببساطة لو القالب تيفال ادهنيه كويس زبدة سايله وبس 

اما لو القالب  الومنيوم يبقى زبدة ورشة دقيق ونفضيها كويس جدا 

بس لو الكيك كلها شوكولا يبقى رشة كاكاو تمام

مهم جدا ااننا نشغل الفرن قبل ما نبدأ فى الحاجات الجميلة دى كلها عشان نكون واثقين جدا انه فى درجة الحرارة اللى احنا عاوزنها وهى 180

بس هندخل الكيك ونقفل خالص بعد 25 دقيقة هنفتح بالراحة جدا ونجط خلة الاسنان فى وسط الكيك مش طرفه لان وسطه اخر شى بيستوى هنلاقى الخلة بس عليها سائل بسيط هنخفض حرارة الفرن ل 160 ونسيبه كمانم 10 دقائق

بس نتأكد تانى انها استوت هنطفيه تماما ونسيب الكيك جوه 10 دقائق عشان لو خرجناها من الفرن عالهوا على رأى نهى اختى هيجيلها برد وتفطس خاااالص منك

هنا قلبتها واضح جدا انها نفشت قوى الافضل اننا نضيف الكيك لحد ثلثين القالب لو مش عاوزنها تخرج لبره قوى كده بس كده جميلة قوى برده\

بس خلصت الكيك واستمتعى برائحة الكيك فى البيت 

About admin

Leave a Reply

Your email address will not be published. Required fields are marked *

*