Tuesday, June 27, 2017

طريقة عمل السبانخ بالصور

السبانخ لها طريقة واحدة باختلاف حاجة واحدة بس تختلف من واحدة للتانية حسب التعود وحسب الرغبة اللى هى فى اثناء طبخ السبانخ بنحتاج نضيف لها حاجة واحدة من دول يا اما (معلقتين كبار رز نئ او حمص طبيخ يكون مستوى او لسان عصفور نئ او فريك )كل واحدة حسب رغبتها بس انا بفضلها بالارز النئ فقط معلقتين كبار ندخل بقة على الوصفة

نحتاج كمية من عصير الطماطم انا بجيب الخلاط واقطع فية الطماطم الطازة وحبة واحدة بصلة متوسطة واضيف ماء واخلط كدة نحصل على عصير طماطم بالبصل ودة اللى هانسبكة وهيكون صوص السبانخ 
نجيب الحلة ونحط فيها معلقة كبيرة سمنة او زبدة حسب الرغبة واول ما تسخن ننزل بعصير الطماطم على طول ونتركة يتسبك مع اضافة مكعب مرقة دجاج وفلفل اسمر بهذا الشكل

دى الخضرة اللى هانستعملها فى السبانخ لازم اضافتها بتديها طعم مميز وتحفة والخضرة دى عبارة عن كزبرة خضراء وشبت فقط لاغير طبعا هانغسلها كويس ونقطعها

دة الرز النئ اللى هانحطة ودى الخضرة المقطعة

هنا بعد ما سبت الصلصلة تتسبك اضيف السبانخ ونكون طبعا مقطعة ومغسولة كويس بس السبانخ دى مجمدة انا اللى عملاها 
فى موسم السبانخ بجيب كمية كبيرة لان ولادى بيعشقوها وبعدين بنظفها واقطعها وانقعها فى ماء كتير علشان بيكون فيها رمل وبعدين اغسلها كويس واصفيها وافرزها خضراء كدة من غير ما اعمل فيها حاجة بس على شرط لما تيجى تطبخيها من الفريزر على الحلة على طول بتكون مفرفرة وحلوة يعنى ماتسبهاش تفك
زى ما انتم شايفين تحسوا ان الكمية كبيرة بس هى هاتقل لان السبانخ فيها كمية من الماء 
نحط السبانخ على الصوص المتسبك ونسيبها تصفى

هايكون دة شكلها بعد ما المية صفت اللى فيها نبدا بقة نضيف الماء او الشوربة حسب الرغبة كمية كويسة تغطى السبانخ

بالشكل دة واول ما تبدا تغلى نضيف والرز ونتركها حوالى نصف ساعة وقبل ما نطفى عليها بعشر دقايق نضيف الخضرة هى مش بتاخد كتير وطبعا نضبط الملح بتاعنا

ودة الشكل النهائى للسبانخ وبالهنا يارب تعجبكم

About admin

Leave a Reply

Your email address will not be published. Required fields are marked *

*