Monday, December 18, 2017

طريقة عمل تشيز كيك المنجا بالصور

يفضل قبل ماتبدون بالوصفة تقرأون هذي التدوينة عن التشيز كيك :)

الطريقة الصحيحة لعمل تشيز كيك ناجح

هذي الوصفة اللي بكتبها ماتحتوي على السور كريم لأن له فتره ينقطع ويرجع في الأسواق و احيانا موجود في اماكن معينة

فعشان كذا اكتفيت هنا بالفيلادلفيا اللي هي أساس التشيز كيك

و بعد تقدرون تغيرون النكهات اللي تبون مو لازم تتقيدون بالمنجا لأن الوصفة أساس لأي نكهة ترغبونها

المقادير:

3 بيضات حجم كبير و أو 4 بيضات حجم صغير

3 قوالب من جبنة فيلادلفيا 300 جرام

و علبة من حجم 200 جرام

كوب سكر

م ص من الفانيليا السائلة او الفانيليا الطبيعية

تلقون الفانيليا الطبيعية في قسم المكسرات بالكيلو في السوبر ماركت

م ص من نكهة المنجا

 

180 جرام بسكوت مطحون – أي شركة تفضلونها

110 جرام زبدة

صوص المنجا :

حبة منجا كبيرة مقشرة و مقطعة مربعات صغيرة

ثلث كوب سكر

ربع كوب موية دافية

—————————————————————–

الوصفة هذي لقالب قطره من 8 ل 9 انش او 23 سم

أول شي نغلف قالب التشيز كيك بالكامل بورق الزبدة مرا ضروري حتى تتماسك الخلطة و يسهل علينا اخراجها

نذوب الزبدة و نقلبها مع البسكوت  ونحطها اول طبقة في القالب ونضغط عليها عن طريق كاس حتى تتوزع مسطحة و بالتساوي

و ندخله الفرن لمدة 10 دقايق على درجة حرارة 150 او 345 فهرنهايت

ونطلعه يرتاح 10 عشر دقايق قبل مانحط خليط التشيز كيك

و مانقفل الفرن لأن لازم يكون الفرن حار قبل ماندخل التشيز كيك

و خلال هذي الفترة نسوي الخلطة

نبدا بالجبن ولازم يكون هو و البيض بدرجة حرارة الغرفة

نخلط الجبن لحد مايصير قوام كريمي بهذا الشكل

وبعدين نضيف السكر و نكهة المنجا و الفانيليا ونخلط لحد مايتجانس

ونضيف البيض وحدة ورا الثانية بشرط تزيد سرعة الخلط من المتوسط للسريع

يعني لو كان 3 بيضات اول بيضتين السرعة متوسطة و آخر وحدة سريع

واذا 4 بيضات اول بيضتين متوسط و آخر ثنتين سريع

طبعا مانطول بالخلط بس مجرد مايتجانس البيض مع باقي الخلطة عشان لا يهبط التشيز كيك من الوسط

نصب الخليط في القالب و نجيب صينية تكون اكبر من قالب التشيز كيك ونحط فيها منشفة صغيرة

و بعدين فوقها القالب و نصب مويه حارة و   لحد مايوصل للثلث

و ندخله الفرن لمدة 50 ل 55 دقيقة ومانفتح الفرن أبدا

و بعد ماتخلص المدة نفتح باب الفرن لمدة دقيقة 

و نرجع نطرفه ونخلي فتحة صغيرة ونترك التشيز كيك يبرد داخل الفرن لمدة ساعة

وبعدين ندخله الثلاجة لمدة 5 ل 6 ساعات وكل مازادت المدة كل ماطلع طعمه احلا

طريقة صوص المنجا :

في قدر صغير نصب المويه الدافية و السكر و قطع المنجا و نخليه على نار وسط لمدة 10 دقايق لحد ماتلين قطع المنجا

وبعدين بالخلاط ونتركه يبرد

او بهراسة البطاطس اذا تفضلون قطع المنجا واضحة اهرسوها وهي حارة و اتركوها تبرد قبل التقديم ب 10 دقايق

About admin

Leave a Reply

Your email address will not be published. Required fields are marked *

*