Monday, March 27, 2017

طريقة عمل غاليت التفاح بالصور

غاليت هي فطيرة ريفية تصنع باليد ولا تحتاج قاعد نخبز فيها..

الغاليت هنا اهم شي عندي العجينة قبل الحشوة لأن العجينة بالنهاية هي اللي ماخذة نص الطعم و الشكل

فلو كانت العجينة رديئة ماراح تستمتعون بالطعم..

عجينة الفطيرة قوامها يكون رقيق و شبه هش..يعني فيها تفتت معقول 

و طبعا عشان نوصل لهذي النتيجة لازم نراعي نسبة البروتين وعدم تكون الغلوتين في العجينة

شرح بسيط للغلوتين..

الغلوتين عبارة شبكة مطاطية متوسعة تتكون نتيجة ارتباط نوعين البروتين في الدقيق (غليادين و الغلوتينين) بوجود موية و هو اللي يعطي القوام القاسي بعد الخبز في العجينة

طيب هالنتيجة مانبيها تكون موجودة في الفطيرة فعشان نقلل من امتصاص الموية و عدم تكون الغلوتين راح نضيف نشا..و النشا راح يساعد في تأخر و تقليل امتصاص الماء و يعطينا القوام الرقيق اللي نبي نوصله..

بالنسبة للحشوة انا مابالغت فيها و لكم الخيار في الاضافات من قرفة او يانسون اي شي يناسب التفاح ضيفوه

المقادير:

عجينة الفطيرة

2 كوب دقيق ابيض

2 م ك نشا

نص م ص ملح

نص م ص سكر

170 جرام زبدة تكون باااردة من الثلاجة و مقطعة مربعات صغيره

12 م ك موية فيها ثلج

مقادير الحشوة

من 3 ل 4 تفاحات النوع الأخضر

2 م ك سكر ابيض ناعم الحبيبات

ربع زبدة مقطعة مربعات

1 م ك مربى مشمش او اي مربى يكون طعمه مناسب للتفاح للطلي آخر شي

————————————————————

نخلط المواد الجافة في العجينة مع بعض و بعدين نضيف قطع الزبدة

و نفركها مع الدقيق

لو ماكانت عندكم هذي الأداة مو مشكلة فركوا الزبدة بالدقيق لحد مايتشكل مثل الفتات

بعدين ضيفوا الموية الباردة على كذا مرا و قلبوا بملعقة خشبية 

بس اهم شي الموية مرا باردة فيها ثلج

بعد ماضفنا كل الموية راح تتكون قطع كبيرة نبدا لمها على بعض  باليد بضغطات خفيفة لحد ماتتكون عندنا قطعة كاملة

و اضغطوا على العجينة خلوها مسطحة شوي و غلفوها بنايلون و دخلوها الثلاجة لمدة ساعة

و تقدرون تحتفظون بالعجينة لمدة يوم او يومين بالثلاجة اذا ماكان عندكم وقت او فرزنوها لمدة شهر

اضبطوا الفرن على درجة حرارة 200 سيلزيوس..

و بعد ساعة طلعوا العجينة و افرودها على  ورق الزبدة  اللي راح يدخل معاه الفرن مو على سطح عادي لأن راح يكون صعب شيله لصينية الخبز فيصير تشيلونه عن طريق ورق الزبدة اسهل

و افردوها على شكل دائرة كبيرة رشوا دقيق قبل بشكل خفيف تحت و فوق العجينة

سمك العجينة يكون نص او ثلاث ارباع 1 سم تقريبا

و ووزعوا التفاح و انثروا السكر  وحطوا الزبدة قبل اللف

بعدين سكروا الاطراف و اضغطوا عليها بشكل خفيف مو مرا بقوة

و امسحوا على اطراف العجينة ببيضة مخفوقة و انثروا سكر زيادة على الأطراف غير  اللي نثرناه فوق التفاح

و دخلوه الفرن لمدة 45 دقيقة تقريبا و آخر  ربع ساعة شغلوا الحرارة من فوق 

و اتركوه يبرد بعد الفرن لمدة نص ساعة..

و ذوبوا المربى على النار مع شوي موية بعدين اطلوا سطح التفاح من فوق بالفرشة

الفطيرة هذي يفضل تقدم مع آيس كريم او صوص كراميل حسيت مو حلوة لحالها 

و بالعافية

About admin

Leave a Reply

Your email address will not be published. Required fields are marked *

*