Monday, December 18, 2017

طريقه عمل كب كيك التراميسو

المقادير :

كوب وربع طحين الكيك منخول ( طبعاً لاني لفيت قطر بكبرها وما حصلت .. دورت في غوووغل عن البديل وحصلت ، فصرت اسوي كميه واحطه في قوطي … البديل يا حلوات هو كوبين ونص طحين عادي ونص كوب نشا اخلطيهم زين ، راح يصير عندج ٣ أكواب من طحين الكيك)

٤/٣ م . ص بيكنج باودر

٢/١ م . ص ملح

٤/١ كوب حليب

١ عود فانيليا .. ( خذته من اللولو هايبر ماركت) اللي ما عندها تحط ٢ م . ص فانيليا

نص اصبع زبده غير مملحه مقطعه إلى قطع صغيره

٣ بيضات كاملات و٣ صفار بيض بحرارة الغرفه

كوب سكر

التشريبه :

سوي كوب نسكافيه وحطي فيه شوية سكر .. طبعا هذا من عندي – لان طريقة مارثا غير هي طالبه مارسالا سيرب واحنا ما عندنا فالبديل النسكافيه

ماسكربوني فروستنج :

كوب وبينج كريم
علبة جبنه ماسكربوني ( تقريبا كوبين ) في درجة حرارة الغرفه
ربع كوب سكر بودرة منخول

الطريقه :

سخني الفرن على حرارة ١٨٠ .. وصفي اوراق الكب كيك في الصواني

انخلي طحين الكيك والبيكنج باودر والملح وخليهم على جنب

سخني الحليب والزبده وعود الفانيليا افتحيه من النص وطلعي البذور وحطيهم في الحليب .. لا ترمين العود حطيه معاهم وخليه على النار لين تظهر الفقاقيع على الاطراف .

صفي الخليط السابق .. في مصفاة الشاي وشيلي عود الفانيليا وارميه .. واتركيه خليط الحليب يبرد

بالخلاط الكهربائي على سرعه متوسطه اخفقي البيض وصفار البيض والسكر

وبعدين اخذي المله اللي خلطتي فيها البيض والسكر وحطيها على حمام مائي واخلطيها لين تحسين ان السكر ذاب والخليط صار دافي .. تقريبا ٦ دقايق .. بس لا يصيد الماي الحار المله

شيلي المله وخلطي الخليط مره ثانيه لين يصير منفوش واصفر باهت وغليظ

بالمبسطه اقلبي الطحين بشويش في الخليط السابق على ثلاث دفعات .. اخذي نص كوب من العجين واخلطيه مع خليط الحليب عشان يغلظ وبعدين رجعي خليط الحليب في خليط العجين واخلطيهم .

وزعي الخليط على اوراق الكيك .. اخبزي الكيك لمدة ٢٠ دقيقه ولين مر نص الوقت فري الصواني .

خلي الكب كيك يبرد وبعدين بططيهم وباستخدام الفرشاه شربيهم بالنسكافيه وخلي الكب كيك نص ساعه يتشرب النسكافيه على راحته وبعدين سوي الفروستنج

ماسكربوني فروستنج :

اول شي تخلطين جبنة الماسكربوني والسكر المطحون مع بعض وخليهم على جنب .. لا تنسون يا حلوات لازم تكون الجبنه في حرارة الغرفه .

في مله ثانيه اخلطي كوب الويبنغ كريم لين يصير جامد

حطي خلطة الجبن فوق الكريمه واخلطيهم بشويش بالمبسطه او بالملعقه

زيني الكب كيك بالكريمه ورشي فوقها بودرة كاكاو .. واستمتعي الطعم

وهذا تطبيقي .. انا سويتهم في الحجم الاصغر من الحجم العادي للكب كيك ..

وبالعافيه

About admin

Leave a Reply

Your email address will not be published. Required fields are marked *

*