Sunday, November 19, 2017

طريقه عمل كب كيك الكاسترد بالصور

مقادير الكاسترد ( ما صورت المقادير لحالها بس ما يبي لها شي )

٤ صفار بيض

١\٢ كوب سكر

١\٤ كوب نشا

ذره ملح

٢ كوب حليب

١و ١\٤ م . ص فانيليا سايله

الطريقه : ( المقادير مقادير مارثا بس هي طريقتها في عمل الكاسترد غير )

تخلطين صفار البيض والسكر والنشا والملح في جدر صغير … وبعد ما تخلطينه تحطينه على نار هاديه … مع الاستمرار في التقليب

وانتي تخلطينه راح تلاحظين ان لون الخليط راح يصير افتح … صبي الحليب شوي شوي واستمري في الخلط

استمري في الخلط لين ما يثقل عندج الخليط … وآخر شي ضيفي الفانيليا

حطي الكاسترد في مله وغطي المله بالنايلون ( خلي النايلون يلامس سطح الكاسترد ، عشان ما تتكون لج طبقه يابسه )

نجي الحين للكيك :

ما راح نستخدم اليوم ورق الكب كيك .. فاللي راح نسويه ان احنا بدهن القوالب بالزبده وبنغطيها بالطحين

ندهن القوالب بالزبده .. انا قطعت الزبده قطع صغيره وحطيت نتفه في كل قالب ودهنتها بالفرشاه .. بنات اشتروا هالفرشاه من تافولا والله عجيبه احسن من السيليكون بواااايد

( اسمها باستري برش)

وبعد ما تدهين القالب بالزبده رشي بطحين بحيث انه يغطي القالب بالكامل

مقادير الكب كيك :

٣\٤ اصبع زبده غير مملحه تقطعينها لقطع صغيره

١ و١\٢ كوب طحين جميع الاستعمالات

١ و ١\٢ م . ص بيكنج باودر

١\٢ م ، ص ملح

١\٢ كوب حليب سائل ( المراعي )

٣ بيضات بحرارة الغرفه

كوب سكر

١ م . ص فانيليا

الطريقه :

سخني الفرن على حراره ١٨٠ درجه

اخلطي الطحين والبيكنج باودر والملح مع بعض وخليهم على جنب

آول شي بنخلط البيض والسكر على سرعه عاليه … تقريباً ٥ دقايق

حطي الحليب والزبده على النار وخليه على نار هاديه

تقللين سرعة الخلاط وتضيفين الطحين بالتدريج … بعد ما تخلصين من الطحين

حطي الحليب والزبده على النار وخليه على نار هاديه

تقللين سرعة الخلاط وتضيفين الطحين بالتدريج … بعد ما تخلصين من الطحين

تأكدي من إن الحليب والزبده وصلوا لدرجه الغليان وبعدين ضيفي خليط الحليب والزبده علي خليط الطحين شوي شوي .. (تذكري لين تخلطين من إن سرعة الخلاط تكون منخفظه عشان ما يجي عليج الحليب الساخن ) ( بس لا تبالغين في الخلط ) يعني يادوب ينخلط عدل

آخر شي تضيفين الفانيليا (اخلطيه شوي )

توزعين خليط الكيك في قوالب الكب كيك

وتخبزينه في الفرن … تقريبا ١٥ دقيقه … او لين ما تشوفيته صار بني فانح او لين غرستي فيه عود اسنان وطلع نظيف
تطلعينه من الفرن وتخلينه في القوالب يبرد عشر دقايق …وبعدين تشيلينه وتحطينه على الشبك لين ما يبرد عدل
وبعدين تقطعين الكب كيك من النص ( الصوره اللي فوق)

اخذي الكاسترد وحركيه شوي لانه بيكون بارد … وحطي ملعقه من الكاسترد على الجزء السفلي من الكيكه
انا حطيت الكاسترد في كيس الحلويات ووزعته على الكب كيك (جذي اسهل )

راح يصير شكله جذي ( الصوره اللي فوق ) وبعدين تصبين فوقه التشوكليت غاناش

تفضلو المقادير والطريقه للتشوكليت غاناش

كوب شوكليت مقطع قطع صغيره ( نص حلو ) ( semi-sweet) (انا استخدمت شكولاتة ليندت ميلك تشوكليت – اللوح الذهبي الطويل)

٢\٣ كوب كريمة خفق

١ م . ك شراب ذره خفيف ( اللي ما عندها مب لازم ) ( انا مره حطيته ومره لا ) فمب شرط

تخلين الكريمه وشراب الذره الخفيف على النار لين ما يغلي ع الخفيف

وبعدين صبيها فوق التشوكليت المقطع وخليه شوي بدون ما تحركينه

بعدين حركيه شوي شوي ..لين ما يذوب التشوكليت كله

وهذا الشكل النهائي للكيكه

About admin

Leave a Reply

Your email address will not be published. Required fields are marked *

*